Пиво Dryhva: Calvados BA - Plague Brew, Malanka

Разам з сябрамі з бровара Plague Brew мы выпускаем нешта незвычайнае. Новая лінейка Dryhva — гэта нашае бачанне балтыйскага портару з краіны балот, самых патаемных куткоў Палесся. Выдатныя цёмныя гатункі соладу ствараюць шчыльную базу колеру моцнай кавы, сушаны на торфе солад дадае лёгкі пах туманаў над тарфянікамі, а вэнджаны на бярозе солад прыўносіць у арамат прыемныя адценні восеньскіх сельскіх печак і кастроў. Каб збалансаваць усё гэтае хараство, пасля павольнага і доўгага браджэння мы адправілі Дрыгву адпачываць у свежую дубовую бонду з-пад кальвадосу, у якой яна добра падсохла і напоўнілася такімі прыемнымі пахамі кастрычнікавага ўраджаю ў яблыневых садах. Прайшла зіма, вясна і лета, надышла восень, а з ёю і момант, калі наш портар дасягнуў свайго найлепшага стану. І менавіта зараз мы жадаем падзяліцца з вамі гэтым маленькім скарбам.