Глог, верагодна, зараз успрымаецца большасьцю людзей выключна як мем, звязаны з даступнымі лекавымі настоямі. Толькі ня варта з паблажлівай усмешкай ставіцца да гэтага дрэва і ягоных пладоў. Яны, сапраўды, вельмі карысныя і дапамагаюць пры сардэчна-сасудзістых захворваннях, а таксама пазітыўна ўплываюць на працу пячонкі і шчытападобнай залозы. Апроч гэтага плады глогу выкарыстоўваюцца і ў кулінарыі. На смак яны падобныя да яблыкаў — мяккія, сопкія, даволі салодкія, з вялікім утрыманнем пектыну. З іх робяць джэмы, мармелады, соусы да розных страваў і нават віно, а мы вырашылі дадаць глог у піва. Базай для яго стаў ліхтэнхайнер — кісла-вэнджаны стыль, які паходзіць з Нямеччыны. Глог зрабіў колер піва жоўта-ружовым і прыўнёс тонкія кветкавыя і ледзь заўважныя медовыя ноткі ў паху, а таксама даўкія адценні ў смаку.